2026 сылы дойдубут Бэрисидьиэнэ Владимир Владимирович Путин Арассыыйа норуоттарын сомоҕолоһууларын Сылынан, Саха Өрѳспүүлүкэтин Ил Дархана Айсен Сергеевич Николаев култуура Сылынан биллэрбиттэрэ. Онтон биһиги улууспутугар утум уонна айыы- тутуу Сылынан уонна Бʏлʏʏ улууһун култууратын эйгэтигэр биир дойдулаахпыт, киэн туттар улуу олонхоһуппут Василий Осипович Каратаев – Харатай Баһылай төрөөбүтэ100 Сылынан биллэриллибитэ. Тохсунньу 24 күнүгэр Сыл арыллыытын нэһилиэкпитигэр ʏɵрʏʏлээх тэрээһинэ ыытылынна. Тэрээһиҥҥэ улуустан Оройуоннааҕы култуура сайдыытын киинин методиһа НАДЕЖДА НИКОЛАЕВНА ИВАНОВА, Надежда Ивановна Ылахова аатынан “Алгыс национальнай культурнай киин специалиһа, Василий Осипович Каратаев аатынан олоҥхоһуттар норуодунай коллективтарын салайааччыта СВЕТЛАНА ТАРАСОВНА ИВАНОВА олонхоһуттарын коллетивынаан уонна биир дойдулахпыт Саха сирин биллиилээх олоҥхоһута В.О. Каратаев-Харатай Баһылай биэс оҕото кэлэн кыттыыны ыллылар.
Мантан салгыы Саха Республикатын култууратын ʏтʏɵлээх ʏлэһитэ, Россия журналистарын союһун чилиэнэ, Култуура сайдыытын уонна норуот айымньытын Оройуоннааҕы киинин методиһа Надежда Николаевна ИВАНОВА тэрээһин сонуннарын суруйуутун билсиҥ:
Тохсунньу 24 күнүгэр биир дойдулахпыт Саха сирин биллиилээх олоҥхоһута В.О. Каратаев-Харатай Баһылай төрөөбүтэ 100 сылынан Бүлүү улууһун култууратын эйгэтигэр биллэриллибит Сыл чэрчитинэн сыл устата ыытыллар «Олоҥхо-тур» бырайыак олоҥхоһут төрөөбүт Бороҕонун нэһилиэгэр саҕаланна. Бороҕон 10-ча олоҥхоһут уутуйан үөскээбит түөлбэтэ. Кинилэр ортолоругар биллэр- көстөр олоҥхоһуттар үс көлүөнэ Гоголевтар (Дьобуй Дьөгүөр, Бүөтүр, Доропуун), икки көлүөнэ Васильевтар (Хаһырыа, Хоохура), Ботукуо, олоҥхоһут Борокуоппай бааллар.
Саха Өрөспүүбүлүкэтин култууратын туйгуна Анна КАРАТАЕВА дириэктэрдээх «Түһүлгэ» култуура уонна успуорт киинин үлэһиттэрэ ыалдьыттары алаадьынан, кымыһынан күндүлүү көрүстүлэр.
Олоҥхоһут олоҕун, айар үлэтин кэпсиир быыстапка көрөөччүлэр болҕомтолорун тардыан тарта. Манна Василий Осипович бэйэтэ илиитинэн суруйбут уонна киниэхэ анаабыт дьоннор суруктара, хаартыскалар, докумуоннар, наҕараадалара бааллар. Кинигэ, хаартыска быыстапкалара турдулар. Экрантан олоҥхоһут олоҥхолуу олороро көстө, олоҥхото кутулла турда.
Дьоро киэһэ арчылааһынтан уонна Саха Өрөспүүбүлүкэтин култууратын туйгуна, биллэр үҥкүү тылын этээччи, олоҥхо толорооччу Семен ФЕДОРОВ Алгыс тойугунан саҕаланна.
Нэһилиэк баһылыга Анатолий Олегович ВАСИЛЬЕВ, култуура сайдыытын уонна норуот айымньытын Оройуоннааҕы киинин методиһа Надежда ИВАНОВА, В. О. Каратаев аатынан олоҥхоһуттар уонна тойуксуттар норуодунай кэлэктииптэрин салайааччыта Светлана ИВАНОВА, Н. И. Афанасьев аатынан орто оскуола учуутала Наталья ПРОКОПЬЕВА эҕэрдэлээтилэр.
Тэрээһин бэлиэ түгэнинэн Василий Осипович төрөппүт биэс оҕолоро кыттыбыттара буолла. Оҕолор ааттарыттан Анна МАНДАРОВА махталын тириэртэ.
Олоҥхону истии түһүмэҕин Бороҕон оскуолатын үөрэнээччилэрин «Утум» түмсүүтэ саҕалаата. Оҕолор салайааччылара Наталья Трофимовна ПРОКОПЬЕВА аҕатын Доропуун олоҥхоһут «Моҕол кугас аттаах Модун Эр Соҕотох» олоҥхотун тилиннэрбитин толорон кэрэхсэннилэр.
Эдэр олоҥхо толорооччу Владар НИКИФОРОВ С. Васильев «Айыы Дьураҕастай» олоҥхоттон быһа тардыыны толордо.
Нэһилиэк талааннаах улахан дьонун «Көрдүгэн» түмсүүтэ (салайааччы Н. Т. Прокопьева), В. О. Каратаев аатынан олоҥхоһуттар уонна тойуксуттар норуодунай кэлэктииптэрэ (салайааччы С. Т. Иванова) В. О. Каратаев биэс олоҥхотуттан быһа тардыылары толордулар.
Дьоро киэһэни Семен ФЕДОРОВ төрүттээбит оһуохай түһүлгэтэ киэргэттэ.
Тэрээһини Анна КАРАТАЕВА уонна А.Д. Макарова аатынан өрөспүүбүлүкэтээҕи култуура уонна ускуустуба колледжын устудьуонката Арина КИРИЛЛИНА иилээн-саҕалаан ыыттылар.
Салгыы нэһилиэк олохтоохторо уонна тур кыттыылаахтара Бороҕон олоҥхоһуттарын үйэтитиигэ уонна утумнааһыны тэрийиигэ, Каратаев сылын үрдүк таһымнаахтык ыытыыга санаа атастастылар, соруктары торумнаатылар.
Бороҕоҥҥо түөлбэ олоҥхото үйэ- саас тухары дуорайа туруохтун!
Саха Республикатын култууратын ʏтʏɵлээх ʏлэһитэ, Россия журналистарын союһун чилиэнэ, Култуура сайдыытын уонна норуот айымньытын Оройуоннааҕы киинин методиһа Надежда Николаевна ИВАНОВА
