Блог

Судаарыстыбаннас күнэ

Бары билэрбит курдук 1990 сыл балаҕан ыйын 27 күнүгэр биһиги өрөспүүбүлүкэбитигэр судаарыстыбаннай суверенитет туһунан Декларация ылыныллыбыта. Декларация өрөспүүбүлүкэбит Россия Федерациятын тэҥ бырааптаах субъега буоларын биллэрбитэ. Саха сирэ бэйэтин социальнай-экономическай сайдыытын, нэһилиэнньэ олоҕун-дьаһаҕын тупсарыы сүрүн хайысхаларын быһаарынар кыахтаммыта. Бу дьаһал олоххо киириитэ биһиги саха норуотугар улахан, дириҥ суолталаах. Маныаха, өйдөрүн -санааларын уурбут, саха норуот туһугар үлэлээбит-хамнаабыт киэн туттар дьоммут, Алексей Кулаковский, Платон Ойуунускай, Максим Аммосов, Исидор Барахов, Степан Аржаков, Василий Никифоров-Күлүмнүүр ааттара үйэлэргэ умнуллубат.
Онтон быйыл Бороҕоммутугар Судаарыстыбаннас күнүн улууска, өрөспүүбүлүкэҕэ биллэр норуот учуутала,сэрии бэтэрээнэ, «Ытык Аҕа» Николай Иванович Афанасьев аатынан оскуолаҕа киэҥ далааһыннаахтык бэлиэтэннэ. Үөрүүлээх линейка, кылаас чааһа,араас викториналар ыытылыннылар. Бары сахалыы таҥас  кэтэн саха буоларбытынан киэн тутта бэлиэтээтибит . Саха сирин былааҕын күөрэччи көтөхтүлэр оскуола бэрэсидиэнэ Колтовская Евдокия кини солбуйааччыта Руслаин Федоров. Ол кэннэ Саха Өрөгөйүн ырыатын тыаһатан бары сүһүөхпүтүгэр турдубут. Саха өрөспүүбүлүкэтин культууратын туйгуна Семен Федоров доллоһутар кылыһахтаах эҕэрдэ тойугунан ситэрэн — хоторон биэрдэ. Салҕыы «Төрүт дойдум Бороҕон»,»Саргыбыт сайыннын» ырыалар ылланнылар. Оҕону төрөөбүт дойдуну таптыырга, дьонунан-сэргэтинэн киэн туттарга иитэр үлэ ыытылынна. Саха Сирэ киэн туттар ыччаттарын, сайдар суолун арыйан сырдыкка, сайдыыга сирдиир оҕолору иитэн таһаарыахтаахпыт! Үүнэ-сайда, чэчирии тур, тапталлаах Сахабыт Сирэ!

Добавить комментарий