Бүтүн аан дойдуга буола турар балаһыанньаны өйдөөн, өйөөн Сэтинньи 4 күнүгэр «Все для Победы! Мы вместе!» Акция Концерт «Түһүлгэ» сынньалан киинигэр киэһэ 7 чаастан үрдүк таһымнаахтык буолан ааста.
Тэрээһин саҕаланыан иннинэ киирэ түһээт уһун көрүдүөргэ «В единстве наша сила» диэн олохтоох модельнай библиотека үлэһиттэрэ Саргылана Петровна, Айталина Анатольевна туруорбут киһи эрэ кэрэхсии көрөр выставката дьон болҕомтотун тартылар. Сэргэстэһэ саалаҕа киириигэ «Үтүө санаа» аһымал дьааһыгар кэлбит дьон ким төһө кыахтааҕынан харчы уктулар. Концерды «Чэмэли» эдэр ийэлэр түмсүүлэрэ, «Дьулуур» Аҕалар түмсүүлэрэ сахалыы үҥкүүлэринэн арыйдылар, Семен Федоров кылыһахтаах ырыатынан силигин ситэрэн биэрдэ. Салҕыы олохтоох муниципальнай тэриллии главнай специалиһа Колтовская Тамара Иннокентьевна бу уустук кэмҥэ балаһыанньа хайдаҕын, туох көмөлөр баалларын саас сааһынан кэпсээн мобилизацияҕа түбэһэн барбыт уолаттар дьонноругар махталын тириэртэ, эҕэрдэ концерды көрөргө ыҥырда. Ырыабыт үҥкүүбүт бэрт өрө көтөҕүллүүлээхтик салҕанан барда, бу чаҕыл түгэҥҥэ биһиги биир дойдулаахтарбыт «Сулус суһума» айар бөлөх солистката Анастасия Николаева, Бүлүүтээҕи норуодунай хор солиһа Афанасий Каратаев уонна нэһилиэкпит айар талааннаах ырыаһыттара, үҥкүүһүттэрэ ис киирбэх ырыаларын, үҥкүүлэрин бэлэхтээтилэр. Кэлбит дьон астынан — дуоһуйан көрдүлэр, иһиттилэр, ытыс дохсун тыаһынан бигэргэтэн уйан дууһалара уһуктан, сайаҕас санаалара сааһыланан инникигэ эрэллээх тарҕастылар. Манна уопсайа 30 500 солкуобай киирдэ. Бу үбү нэһилиэктэн мобилизацияҕа барбыт биир дойдулаахтарбытыгар көмө харчы быһыытынан олохтоох дьаһалтаҕа туттарылынна. Биһиги нэһилиэктэн 9 уол ытык иэстэрин төлүү сылдьаллар. Хас биирдии киһи өйө-санаата түмүллэн эрэл кыыма буолан тиийиэ диэн бүк эрэнэн, уолаттарбыт санааларыгар дойдубут дьоно бииргэлэр диэн күүстэригэр күүс эбэн санааларын бөҕөргөтөн тиийиэхтин. «Кыайыы туһугар — бары биир сомоҕо!» буолуоҕун. Санааларын ууран биир сомоҕо, түмсүүлээх буолууга кыттыспыт, бэйэлэрин кылааттарын киллэрбит бука бары дьоммутугар үгүрү -сүгүрү буолуохтун. Күөх халлааҥа ил-эйэ олохтоннун!
