Бүлүү улууһа Сахабыт сирин биир баай историялаах, дириҥ силистээх-мутуктаах, улуу олоҥхоһуттар, ылбаҕай ырыаһыттар, доллоһутар тойуксуттар, сытыы тыллаах чабырҕахсыттар уутуйан үөскээбит улуустара буолар. Быйыл онус төгүлүн ыытыллар, үбүлүөйдээх «Түөлбэ талаана» култуурунай-сырдатар бэстибээл, улуус бары нэһилиэктэрин хабан, түөлбэлээн олорор сирдэринэн, бөлөх-бөлөх ыытыллан тʏмʏктэннэ. Ахсынньы 17 күнүгэр, Боро5он нэһилиэгэр Орто Булуу түбэтин түөрт нэһилиэктэрэ (Тыымпы, Хампа, Дьоккон, Боро5он), «Түөлбэ талаана» улуустааҕы бэстибээлгэ, фольклор 5 жанырыгар күрэхтэһэн, кэрэ киэһэни бэлэхтээтилэр. Улуус кииниттэн, Култуура дыбарыаһын үлэһиттэрэ тахсан дьүүллүүр сүбэҕэ үлэлээтилэр (Бэрэссэдээтэлинэн Додутов Н.В.үлэлээтэ). Ону таьынан тɵрɵɵбʏт тɵрʏт дойдубут кэрэ кɵстʏʏлэрин кɵрдɵрɵр «Тɵрʏт дойдум хаартыска хара5ынан» хаартыска быыстапката, нэҺилиэк уран тарбахтаахтарын оҥоҺуктарын быыстапката туруорулунна.
Олоҥхо норуот тылынан уус-уран айымньытын чыпчаала буолар. Этэр тыл эгэлгэтэ, саҥарар саҥа сайаҕаһа барыта олоҥхоҕо кэпсэнэр, хоһуйуллар, саха омук тыына, фольклорун чыпчаала барыта олоҥхоҕо түмүллэр. Бэстибээлгэ түөрт нэһилиэк олоҥхотун тото-хана дуоһуйа иһиттибит, кэрэхсээн көрдүбүт. Чахчы даҕаны, Саха омук олоҥхобут аатырыан аатырар эбит диэн сэмээр киэн тутуннубут. Эдэр чэгиэн ыччаттарбыт доллоһута тохтор көмүс тойугунан, кылыһахтаах ырыаларынан бар дьоннорун сөхтөрдүлэр. Дэгэрэҥ ырыа көрүҥэр, эдэркээн оҕолор ыллаан туойан, көрөөччүлэри сэргэхситтилэр. Фольклорбут биир ураты истиҥ көрүҥүн, дэгэрэҥ ырыаны чахчы да баһылаабыт ыччаттарбыт үүнэ-сайда турдуннар. Бэстибээлгэ кыттыбыт түөрт нэһилиэк тойуксуттара,төрөөбүт дойдулара кэрэтин,Сахабыт сирэ чэчирии сайдарын туһунан туойан доллоһуттулар. Хомус -саха омук муусукатыгар, фольклоругар биир ураты миэстэни ылар музыкальнай инструмена буолар. Хомус алыптаах кутуллар муусукатын бэстибээл кыттааччылара бары даҕаны чахчы баһылаабыттарын көрдөрдүлэр. Жюри чилиэттэрэ Орто Булуу тубэтэ хомуьу чахчы баьылаабыт эбит диэн сыаналаатылар. Араас көтөр-сүүрэр саҥатын, сахабыт сирин кэрэтин хомус нөҥүө сыыйа тардан бар дьоннорун үөртүлэр. Чабырҕах-олоххо баар итэҕэһи-быһаҕаһы көрдөрөр, бэйэ бодону тардынарга сүбэлиир аналлаах, сытыы тыллаах фольклор кɵрʏҥэ буолар. Туьулгэ КСК үрдүк сыанатыгар, чаабы-чыыбы тыллаах чабырҕахсыттар былааһы ылыан ыллылар, көрөөччүлэри үөрдэн-көтүтэн сэргэхситтилэр.. Дьэ бу курдук, «Түөлбэ талаана» бэстибээл Орто Булуу эҥээригэр сыалын-соругун толору ситэн ыытылынна. Бэстибээлгэ кыттыбыт талба талааннаахтарбытыгар, уран оҥоҺуктарынан быыстапка5а кыттыбыт ураты дьо5урдаах иистэнньэннэрбитигэр, итии аьынан хааччыйбыт Константиновтар дьиэ кэргэттэригэр бар5а махтал тылларын тиэрдэбит.
