Бүгүн, ыам ыйын 16 күнүгэр Дойдуга дьиэ кэргэн күнүн чэрчитинэн ыытыллар биир бэлиэ тэрээһин » Иллээх — эйэлээх, дьиэ кэргэн » сүүрүүлээх- көтүүлээх күрэхтэһиитэ тыҥааһыннаахтык, бэрт интэриэһинэйдик, үрдүк таһымнаахтык буолла. Күрэҕи «Түһүлгэ» КСК, олохтоох дьаһалта, дьахтар Сэбиэтэ иилээн-саҕалаан ыыттылар. Тэрээһин өрө көтөҕүлүүлээхтик спорт, дьиэ кэргэн бырааһынньыгын сиэринэн ааста. Тэрээһин арыллыытыгар эҕэрдэ тыллар этилиннилэр, өрүү барытыгар көхтөөх дьиэ кэргэттэргэ олохтоох дьаһалта аатыттан эҕэрдэ суруктары, сертификаттары туттартаата олохтоох дьаьалта кылаабынай специалиьа Тамара Иннокентьевна Колтовская. Елисей Белолюбскай, Парасковья, Семен Федоровтар ылбаҕай ырыаларынан эҕэрдэ ууннулар. Дьахтар сэбиэтин бэрэссэдээтэлэ, элбэх оҕолоох ыал иһирэх ийэтэ Федорова Парасковья Степановна эҕэрдэлээтэ, сэмэй бэлэхтэри туттарда.Ыччат-спорт саҥа үлэһитэ Константинов Алгыс Николаевич бастакы тэрээһинин көхтөөхтүк кыттан саҕалаата.
Күрэх кыттыылаахтара 5 дьиэ кэргэн спорт көрүҥнэригэр күүстэрин холоннулар, таабырыннары таайдылар, оҕолор сыл логотиптарынан пазллары хомуйууга күрэхтэстилэр. Халлааммыт ардахтаах, тыаллаах да буоллар дьон кэлэн көрөн ыһыытаан — хаһыытаан дьиэ кэргэттэргэ күүс -тирэх буоллулар. Күрэхпит биэс түһүмэҕинэн ыытылынна, сэрэбиэй тардыбыт бэрээдэгинэн илин — кэлин түсүһэн бардылар. Күрэхтэһиини комментарийдаата Семен Федоров. Дьиэ кэргэн бары күргүөмүнэн сылдьан күрэхтэстилэр. Сүрүннүүр судьуйанан боротокуолу толордо Константинова Мария Николаевна. Ол түмүгүнэн маннык миэстэлэр таҕыстылар:
1м — Вася, Күннэй Никифоровтар, Алгыс Константинов
2м — Эрчим, Саргыяна, Алексей Готовцевтар
3м — Байдам, Мария, Елисей Белолюбскайдар.
Кыайыылаах дьиэ кэргэттэрбит грамотанан, мэтээлинэн наҕараадаланан, илии тутуурдаах астынан — дуоһуйан тарҕастыбыт. Кэлэн көрөн хас биирдии күрэхтэһээччигэ ыалдьыбыт дьоммутугар махтанабыт, куруук бу курдук түмсүүлээх, барыга бары инники күөҥҥэ сылдьыҥ, дьоллоох — соргулаах, бэйэ- бэйэни өйдөһөн- өйөһөн олоххут усталаах — туоратыгар, иллээхтик- эйэлээхтик олоруҥ диэн алгыс тылбытын анаатахпыт буолуохтун!
