Оҕо – киһи кэскилэ, кини олоҕун салгыыр, туйаҕын хатарар ыччата. Бэс ыйын 1 кʏнʏгэр Аан дойдутааҕы Оҕо кɵмʏскэлин кʏнʏн бэлиэтиибит. Нэһилиэкпитигэр Оҕо кɵмʏскэлин күнүн спорт былаһааккатыгар бары нэһилиэк олохтоохторо оҕолорбутун кытта киирэн, үөрэ — көтө оонньоон атаардыбыт.
Оҕолорбут парадтаан киирэн сэлэлии турбуттарын кэннэ, Семен Федоров алгыс тылынан анаан –минээн сир- дойду иччилэрин үрүҥ илгэнэн айах тутан, дорҕоонноох тойугунан туойан оҕо күнүн арыйда. Биһиги кырачааннарбыт «Оҕо саас» флешмоб үҥкүүтүн үҥкүүлээн тэйдилэр, үөрбүт — көппүт харахтара чоҕулуччу көрдүлэр. Бу кэннэ тэрээһин үөрүүлээх чааһыгар оҕо уһуйаанын сэбиэдиссэйэ Гаврильева Валентина Дмитриевна эҕэрдэлээтэ. Үлэһиттэргэ, саамай актыыбынай төрөппүттэргэ, бу үөрэх дьылыгар көхтөөхтүк араас тэрээһиннэргэ, күрэхтэргэ кыттыбыт, миэстэлэспит оҕолорго грамоталары, бэлэхтэри туттартаата. Эҕэрдэҕэ кыттыһан «Түһүлгэ» сынньалаҥ киинин үлэһиттэрэ Елисей Белолюбскай, Семен Федоров ылбаҕай ырыалары ыллаан кэлбит дьоҥҥо эҕэрдэ ууннулар . Салгыы оторой — моторой көрбүт оҕолорбут концертарын ырыаларын — үҥкүүлэрин биир тыынынан астына дуоһуйа көрдүбүт, ытыспыт тыаһын бэлэх ууннубут.
Подготовка оҕолорун оскуолаҕа атаарыы үөрүүлээх быһыыга — майгыга ааста, төрөппүттэр эҕэрдэ, махтал тылларын эттилэр, уһуйааннарыгар сэмэй бэлэхтэрин туттардылар. Эбиэт бириэмэтэ буолан оҕолору бырааһынньыктааҕы остуолга олортулар, ону кытта тэҥҥэ кэлбит ыалдьыттарга атыы — эргиэн түһүлгэтэ тэрилиннэ. Бары тото — хана аһаан баран аны күрэхтэһиилэргэ харса суох киирдибит. Бастаан төрөппүттэр аҕалар, ийэлэр, эбээлэр илин — кэлин түһүстүбүт, үөһэ — аллара тыынан ыллыбыт. Салгыы оҕолор сүүрдүлэр, эстэпиэтэлээтилэр. Кыайыылаахтарга сэмэй бэлэхтэри туттартаатылар. Олохтоох модельнай библиотекабыт оҕолорго аналлаах кинигэ быыстапкатын туруорда. Аттракцион, бириистээх оонньуулар оонньонуллунар. Уһуйааммыт тэрээһинэ оҕолор, төрөппүттэр үҥкүүлэринэн түмүктэннэ.
Бырааһынньык иккис чааһа, дьэ, оскуола оҕолоругар бастакытын футбол күрэҕэ буолла. Биэс хамаандаҕа арахсан күрэхтэстилэр. Бу бэртээхэй тэрээһини спорт специалиһа, саҥа үлэһит Константинов Алгыс Николаевич кɵҕʏлээһининэн тэрилиннэ. Күрэхпит буоларын курдук спортсменнар парадтарынан саҕаланна. Эдэр ыччат оҕолор аныгы үҥкүүлэринэн арылынна. Эҕэрдэ тылы кулууп специалиһа Семен Федоров, спорт специалиһа Алгыс Николаевич эттилэр, күрэхтэһии быраабылатын быһаардылар, ол кэннэ сэрэбиэй бэрээдэгинэн оонньуу саҕаламмытынан барда. Күрэхтэһиини комментарийдаата кулууп специалиһа Елисей Белолюбскай, саҥаран — иҥэрэн бэркэ ыытта. Ыһыылаах — хаһыылаах, сүүрүүлээх — көтүүлээх оонньуу кэннэ судьуйалар үс миэстэни маннык таһаардылар:
1м — «Зенит» хамаанда хапытаана Айхал Каратаев.
2м — » Боруссия» хамаанда хапытаана Антон Колтовской.
3м — «Черепашки» хамаанда хапытаана Эллэй Федоров.
Дьэ бу курдук өрө күүрүүлээхтик биир күммүт биллибэккэ ааста. Бары да астынан, махтанан биир үтүө күнү бэлэхтээбит оҕолорбутугар, төрөппүттэргэ барҕа махталбытын тиэрдэбит. Оҕолорго дьоллоох оҕо сааһы, төрөппүттэргэ оҕолоргут тапталларынан, ситиһиилэринэн угуттанан уһун дьоллоох олоҕу баҕара хаалабыт.
Оҕо баар — олох төрдө, оҕо баар — таптал уйата. Куруук үөрэ-көтө, чэгиэн чэбдик буолуҥ! Туругурдун Оҕо күнэ
