Муус устар 1 күнүгэр Аҕа дойду Улуу сэриитин бэтэрээнигэр, РСФСР уонна Саха АССР үтүөлээх учууталыгар, Саха Өрөспүүбүлүкэтин норуодунай учууталыгар Афанасьев Николай Ивановичка Бороҕон нэһилиэгин баһылыга Иванов А.И., оскуолаттан Прокопьева Н.Т. «Саха Өрөспүүбүлүкэтин Бочуоттаах олохтооҕо» диэн үрдүк аатынан э5эрдэлээн туран, Эҕэрдэ суругу кытта биир дойдулаахпыт, талааннаах тимир ууһа, сэтинньи ыйга Москуба куоракка буолбут «Клинок -традиции и современность» норуоттар ардыларынааҕы күрэххэ кыайыы өрөгөйүн билбит үөрэнээччитин Каратаев А.Н. «Николай Ивановичка Бороҕонуҥ дьонуттан» диэн анал суруктаах кыыннаах быһаҕын туттардылар. Николай Иванович бэлэҕи сүрдээҕин кэрэхсээтэ: «Бэртээхэй быһах эбит»,-диэн астынна уонна Андрей Николаевичка, нэһилиэгин дьонугар улахан махталын биллэрдэ. Салгыы кини билиҥҥи кэмҥэ оҕо оскуолаҕа киириэр диэри сайдар кэмигэр улахан болҕомто ууруллан, бэл ааҕар- суруйар үөрүйэҕи сатыыр буоллаҕына, салгыы үөрэнэригэр ыарырҕатыа суоҕун таһынан, саҥалыы көрүүлэрин үллэһиннэ.
Дойдубутугар буолар быһыыны-майгыны ырытан, хайдах сайдыахха сөбүн сүбэлээтэ. Ону тэҥэ тыа хаһаайыстыбата инники күөҥҥэ туруон, бэйэ аһа-үөлэ дэлэйэн, дьон доруобуйатыгар туһалаах буолуоҕун ыйда. «Олус өҥ, уйгу-быйаҥ дэлэйиэн сөптөөх сиригэр олороҕут. Үлэлээҥ-хамсааҥ, дойдугутун сайыннарыҥ, ыччаты олохсутуҥ»,-диэн баҕа санаатын тиэртэ. Икки кинигэни суруйан бүтэрбит үөрүүтүн үллэһиннэ. Олортон «Мы работали и учились» диэн кинигэтин кэҥэтэн, эбэн биэрбитин таһынан биир хоһоонун хомуурунньугун оҕо да, улахан да киһи өйдүүр гына судургу тылынан-өһүнэн суруйбутун этэн туран, ити кинигэлэр иитэр-үөрэтэр кыахтарын таба өйдөөн, туһаныахпытыгар баҕа рда. Эмиэ итинник «СӨ Бочуоттаах аат» диэн үрдүк бэлиэнэн биир дойдулаахпыт Аҕа дойду Улуу сэриитин бэтэрээнэ 102 саастаах Ытык кырдьаҕаспыт Колтовской С.И. иҥэриллибитин туһунан истэн турабыт. Онон эмиэ биир Сүдү Киһибитигэр дириҥник махтанан, сүгүрүйэн туран Бороҕон нэһилиэгин аатыттан Эҕэрдэ суругу кытта тимир ууһа Каратаев А.Н. оҥорбут быһаҕын нэһилиэк аатыттан суруктаан-бичиктээн туттарбыттарын иһитиннэрэн ааһары наадалааҕынан ааҕабын. Кыайыы 80 сылын көрсө Аҕа дойду Улуу сэриитин бэтэрээннэригэр, биир дойдулаахтарбыгар, Сахабыт сирин Ил Дархана А.С.Николаев Укааһынан итинник Үрдүк наҕарааданы ылбыттарынан, биһиги нэһилиэк дьоно-сэргэтэ улаханнык махтанан туран, бэтэрээн дьоммутугар, кинилэр дьиэ кэргэннэригэр этэҥҥэ буолууну, дьолу-соргуну баҕарабыт!
Н.Прокопьева
