Сэтинньи 18 күнүгэр нэһилиэкпитигэр спорт сайдыытыгар сүҥкэҥ кылаатын киллэрбит норуот үөрэҕириитин туйгуна, Саха Өрөспүүбүлүкэтин физкультураҕа уонна спорка туйгуна, Бороҕон нэһилиэгин бочуоттаах олохтооҕо, тыыл, үлэ бэтэрээнэ, ытыктыыр учууталбыт Семенов Иннокентий Тимофеевич аатын спорт саалатыгар үөрүүлээх быһыыга-майгыга иҥэрии тэрээһинэ ыытылынна.
Бу дьылга өссө биир суолталаах бэлиэ түгэнинэн, нэһилиэкпитигэр спорду тэрийээччилэрбит көҕүлээһиннэринэн, олохтоохтор күүстэринэн маҥнайгы спорт саалата тутуллубута 50 сылын бэлиэтиибит. Ол кэмнэргэ оройуон тыатын нэһилиэктэригэр бастакы спорт саалата этэ. Ол кэмтэн ыла үгүс көлүөнэ ыччаттарбыт эт-хаан өттүнэн сайдан, спорка ситиһиилэнэн кэллэхтэрэ. Дьону-сэргэни түмэр, чөл олоҕу түстүүр киэҥ уораҕайбытыгар үгүс элбэх тэрээһиннэр, күрэхтэр ыытыллан кэллилэр.
Иннокентий Тимофеевич нэһилиэк чөл туруктаах буоларын туһугар туруулаһан үлэлиирэ, чэгиэн олоҕу өрө тутан спорт араас көрүҥнэригэр оҕолору, олохтоохтору көҕүлээччи, энтузиаст уһуйааччы этэ.
Үөрүүлээх тэрээһиҥҥэ нэһилиэкпит баһылыга Анатолий Васильев, Иннокентий Тимофеевич оҕолоро, аймах-билэ дьонноро тыл эттилэр, эҕэрдэлэрин тиэртилэр. Иннокентий Тимофеевич оҕолоро нэһилиэк салалтатыгар, депутаттарыгар, нэһилиэк дьонугар улахан махталларын тиэртилэр, астыммыттарын биллэрдилэр, эдэр көлүөнэ оҕолорбут эти-сиини сайыннарар саалаҕа сылдьан эрчиллэн, спорт араас көрүҥэр үрдүк ситиһиилэри ылалларыгар баҕардылар.
Салгыы түөлбэлэринэн дуобакка, саахымакка, дартска күрэхтэһии тэрилиннэ.
Тыҥааһыннаах киирсиилэр түмүктэрэ маннык буолла:
Дуобат күрэҕэр :
1 миэстэ- «Кэскил» түөлбэ
2 миэстэ- «Күндэ» түөлбэ
3 миэстэ- «Сарыал» түөлбэ.
Саахымат күрэҕэр:
1 миэстэ- «Күндэ»түөлбэ
2 миэстэ- «Кэскил» түөлбэ
3 миэстэ- «Сарыал»түөлбэ.
Дартс күрэҕэр:
1 миэстэ- «Сарыал» түөлбэ
2 миэстэ- «Күндэ»түөлбэ
3 миэстэ- «Кэскил»түөлбэ.
Түөлбэлэрин чиэһин көмүскээбит, бары кыттыбыт спортсменнары эҕэрдэлиибит,
спорду, чөл олоҕу куруук өрө тутуохха, маассабай спордунан дьарыктаныахха диэн барыгытын ыҥырабыт!
Олохтоох дьаһалта
