Сэтинньи ый 22-23 күннэригэр нэһилиэкпитигэр спорт сайдыытыгар сүҥкэҥ кылааттаах, Саха Өрөспүүбүлүкэтин физкультураҕа уонна спорка туйгуна, Бороҕон нэһилиэгин бочуоттаах олохтооҕо, тыыл, педагогическай үлэ бэтэрээнэ, ытыктыыр учууталбыт Семенов Иннокентий Тимофеевич сырдык аатын үйэтитэр сыаллаах, кини төрөөбүтэ 95 сааһыгар, Улуу Кыайыы 80 сылыгар, нэһилиэкпитигэр маҥнайгы спорт саалата үлэлээбитэ 50 сылыгар анаммыт волейболга аһаҕас турнир үрдүк таһымҥа тэрээһиннээхтик ыытылынна.
Икки күннээх тыҥааһыннаах волейбол күрэҕэр 7 эр дьон, 5 дьахтар хамаандалара күөн көрүстүлэр, ол курдук эр дьоҥҥо:
Бороҕон, Бүлүү ДЮСШ, Хампа, Лөкөчөөн, Тыымпы, Мукучу, Кыргыдай.
Дьахталларга:
Бороҕон, Хампа, Бүлүү ДЮСШ, Тыымпы, Мукучу.
Бары хамаандалар туох баар кыахтарын, сатабылларын биэрэн, кыайыыга дьулуурдарын көрдөрөн, чаҕылхай оонньууларынан көрөөччүлэри астыннардылар. Ордук бэлиэтиэҕи баҕарыллар Лөкөчөөн хамаандатын эдэр кэскиллээх волейболиһын Новиков Айастааны, «Лөкөчөөн хотойо» диэн ааттанан олус кыраһыабай оонньуулары көрдөрдө.
Иннокентий Тимофеевич Семенов аатынан спорт саалата икки күнү быһа оонньуулар тыҥааһыннарыттан, көрөөччүлэр хаһыыларыттан өрө ньиргийэн олордо.
Сытыы киирсиилэр кэннилэриттэн түмүк маннык буолла,
дьахталларга:
1 миэстэ-Хампа
2 миэстэ-Бүлүү ДЮСШ
3 миэстэ-Бороҕон.
Эр дьоҥҥо:
1 миэстэ- Бороҕон
2 миэстэ- Бүлүү ДЮСШ
3 миэстэ- Хампа.
Бары призердарга нэһилиэкпит баһылыга Анатолий Васильев, Семенов Иннокентий Тимофеевич оҕолоро, аймахтара кубоктары, мэтээллэри, грамоталары, сыаналаах бириистэри туттардылар.
Маны сэргэ чаҕылхай оонньуулары көрдөрбүт, үрдүк ситиһиилэммит спортсменнарга анал ааттар иҥэрилиннилэр, сертификаттары, сыаналаах бириистэри тутан үөрдүлэр-көттүлэр.
Кʏрэхтэһии бастакы кʏнʏгэр киэһэ 8 чаастан Эҕэрдэ Концерт, Иннокентий Тимофеевич олоҕун кэпсиир видеослайд кɵрдɵрʏлʏннэ уонна кини спортка уһуйбут дьоннорун аатыттан, Боро5он нэьилиэгин бочуоттаах олохтоо5о Анатолий Алексеевич Колтовской ахтан санаан ааста. Концертка ыалдьыттартан эмиэ кыттыыны ыллылар. Ол курдук биир дойдулаахтарбыт, эдэр кэскиллээх ырыаһыттар Василий Николаев, Афанасий Каратаев хастыы да ырыаны ыллаан кɵрɵɵччʏ биһирэбилин ылыахтарын ыллылар.
Волейбол турнирын сүүрэн-көтөн тэрийсибит, көмөлөспүт Семенов Иннокентий Тимофеевич дьиэ кэргэнигэр, аймахтарыгар барҕа махталбытын тиэрдэбит. Күрэхтэһии тэрээһинигэр көмөлөспүт бары дьоммутугар, бириистэргэ үбүнэн көмөлөспүт, кыттыспыт Бороҕон оскуолатын араас кэминээҕи бары выпускниктарыгар, нэһилиэкпит олохтоохторугар истиҥ махталбытын биллэрэбит.
