Кулун тутар 6 күнүгэр балаҕан дьиэбитигэр, хаьаайка Наталья Трофимовна Прокопьева, олохтоох библиотека Саргылана Петровна уонна жен. комитет председателя Парасковья Федорова кө5үлээьиннэринэн Кэрэ аҥардарга аналлаах сааскы бырааһынньыгы көрсө биир эмиэ сэргэх тэрээһин буолла. Сааскы чэбдик салгыннаах бэртээхэй күҥҥэ нэһилиэкпит эйэҕэс эбэлэрэ, иһирэх ийэлэрэ, эдэр Куолара биир түһүлгэҕэ үөрэ-көтө муһуннулар. Сахалыы сиэринэн Аал уоппутун аһаттыбыт. Үөрэ отунан арчыланныбыт. Ол кэннэ ирэ-хоро кэпсэтэн, сандалы остуол тула олорон быырпаҕынан, күөрчэхтээх алаадьынан, буспут сылгы этинэн, итии үүттээх чэйи истибит. Ол кэннэ талааннаах тарбахтаахтар оҥоһуктарын сиһилии сэһэргээн, кэрэ оҥоһуктарынан кэлбит дьону сэргэхситтилэр. Эдэр ийэ Васильева В.В. оҕуруонан кыыс оҕоҕо оҥорбут араас дьэрэкээн киэргэллэрэ, Федорова П.С. субу көтөн тахсыах курдук чыычаах оҥоһуга, иистэнньэҥ эбэлэрбит: Мальцева А.В. сүөһү хабаҕынан тигиллибит киэргэллээх суумкалара, Кондратьева И.Н. кыыс оҕо сахалыы оһуор-мандар бастыҥалаах сайыҥҥы комплект таҥаһа, дьиэҕэ ыйанар харысхаллара, Федорова А.И. кыбытык тигиилээх киэргэл олбохторо, Тимофеева М.Г. сиэлинэн оҥоһуллубут угунньулара, Каратаева С.П. маллаах иһитэ, кыыс оҕо баттаҕын киэргэлэ, Семенова З.Н. күрүчүөгүнэн сыттыга. Бары оҥоһуктары киһи эрэ сөҕө-махтайа көрөр үлэлэрэ. Ити кэннэ атыы-кутуу арааһа, аһыгар-үөлүгэр тиийэ атыыланна. Түгэнинэн туһанан үбүлүөйдээх балаҕан хаһаайкатын Прокопьева Н.Т. кэлбит дьон итиитик-истиҥник эҕэрдэлээтилэр, дьоһун бэлэхтэринэн үөртүлэр. Санаа астынар, дууһа үөрэр биир сааскы бырааһынньык истиҥ быһыыга-майгыга буолбута барыбытын астыннарда.
